आयुवेर्दिक चिकित्सालयमा निशुल्क स्वास्थ्यशिविर

धनगढी । धनगढी–१३ स्थित राजपुरमा रहेको प्रादेशिक आयुर्वेद चिकित्सालयले ४ दिने स्वास्थ्यशिविर सुरु गरेको छ ।

अस्पताल सञ्चालनका लागि सवै तयारी पुरा भइसकेको अवस्थामा आम नागरिकलाई सेवा सञ्चालनको जानकारी दिन निशुल्क स्वास्थ्यशिविर सञ्चालन गरिएको प्रदेश आयुवेर्दिक औषधालयका निमित्त निर्देशक खगेन्द्र बमले बताए ।

अस्पताल सञ्चालनका लागि सवै व्यवस्थापन भएपनि प्रचार–प्रसार नहुँदा बिरामी नआएपछि शिविर सञ्चालन गरिएको व्यवस्थापन समितिका अध्यक्ष नरेश विष्टले बताए । ‘भवन तयार भईसकेको छ तर अस्पतालबारे आम नागरिकलाई जानकारी छैन,’ उनले भने, ‘शिविर सञ्चालन गरेपछि धेरै मानिसले जानकारी पाउने र बिस्तारै अस्पतालबाट सेवा लिन आउनेको संख्या बढ्ने अपेक्षाच गरिएको छ ।’ उनले अस्पताल संचालनका लागि पहिलो चरणमा ओपीडि सेवा र ल्याव सेवा मात्रै सञ्चालन गरिएको बताए । 

विरामीको चाप बढेपछि थप सेवा विस्तार गर्ने तयारी रहेको उनले बताए । ‘तत्कालका लागि ४ दिनको स्वास्थ्य शिविर सञ्चालन गरिएको छ,’ विष्टले भने, ‘दशैपछि यो कार्यक्रमलाई निरन्तरता दिइने छ ।’

अस्पतालमा कर्मचारी संगठन तथा व्यवस्थापन सर्भे भई स्वीकृत भईसकेको बताए । अन्तरंग सहितको सेवा उपलब्ध गराउने गरि सञ्चालनमा ल्याइन लागेको चिकित्सालयमा पाँच जना चिकित्सक (डाक्टर), प्राकृतिक चिकित्सक र होमियोप्याथिक एक÷एक, कविराज चार, स्टाफ नर्स दुई, ल्याब, रेडियोग्राफर एक÷एक र अन्य गरि ३५ जना कर्मचारीको दरबन्दी रहने भएपनि तत्कालका लागि भने ६ जना डाक्टर खटिएका छन् ।

‘अस्पताल सञ्चालनका लागि सवै व्यवस्थापन भइसकेको छ,’ निमित्त निर्देशक बमले भने, ‘तर सेवा ग्राहीलाई त्यबारेमा जानकारी छैन, अस्पतालले सेवा सञ्चालन गरेको बारेमा जानकारी दिन शिविर सञ्चालन गरिएको हो ।’

शिविरमा ६ जना आयुवेदिक डाक्टरले स्वास्थ्य परिक्षण गराएका थिए । स्वास्थ्य शिविरमा सेवा लग्न आएका नागरिकलाई निशुल्क ल्याव परिक्षण र औषधी वितरण गरिएको उनले बताए । उनका अनुसार शिविरको पहिलो दिन १ सय ६५ जनाले स्वास्थ्य परिक्षण गराएका छन् ।

स्वास्थ्य परिक्षण गराउनेमा १ सय ४० जना महिला र २५ जना पुरुष रहेका बमले बताए । ती मध्य ४६ जनाको ल्याव परिक्षण गरिएको छ ।

पहिलो दिन स्वास्थ्य परिक्षण गराएका मध्य अधिकांस विरामीमा बाथको समस्या देखिएको उनले बताए । त्यसैगरी ग्यास्ट्रिक, पायल्स, महिनावारी समस्या तल्लो पेट दुख्ने समस्या भएका विरामी पनि शिविरमा आएका निमित्त निर्देशक बमले बताए ।

संघिय सरकारले २०६८ सालमा सुदूरपश्चिम प्रदेशमा आयुर्वेद अस्पताल सञ्चालन ल्याउने उद्देश्य सहित क्षेत्रीय आयुर्वेद अस्पताल नामाकरण गरेको थियो । २०७७ सालको प्रदेश मन्त्रीपरिषदको बैठकले प्रादेशिक आयुर्वेद चिकित्सालय नामाकरण गरि सञ्चालनको तयारी गरिएको थियो ।

सो भवनको ठेक्का २०६८ सालमै अघि बढे पनि निर्माण कार्य २०७४ पुष देखि मात्रै अघि बढाइएको थियो । वनले स्वीकृति नदिँदा भवन निर्माणको कार्य छ वर्षसम्म अघि बढ्न सकेको थिएन । अस्पताल निर्माणका १८ करोड खर्च भएको जनाइएको छ ।

नियमित सेवा सञ्चालन हुन्छ : सचिव लामिछाने

 सुदूरपश्चिम प्रदेश सामाजिक विकास मन्त्रालयका सचिव दिपक लामिछानेले आगमी दिनमा प्रादेशकि आयुर्वेदिक औषधालयबाट नियमित सेवा सुचारु हुने बताएका छन् ।

मंगलबार आयुर्वेदिक औषधालयमा सुरु भएको स्वास्थ्य शिविरमा उनले उपचारमा आउने विरामीलाई आफ्नो समुदायमा सेवाका बारेमा जानकारी दिन समेत आग्रह गरे ।

‘अस्पतालमा दक्ष जनशक्ति रहेका कारण जन अपेक्षा अनुसार सेवा सञ्चालन हुने अपेक्षा गरेका छौं,’ उनले भने, ‘त्यसका लागि सेवा ग्राही आउनु जरुरी छ ।’ अस्पतालले दिर्घरोगिलाई बढी ध्यान दिने उनले बताए । अस्पतालले आयुवेर्दिक पद्धतिबाट सेवा सुचारु गरेपनि उपचार विधि परम्परागत मात्रै नहुने उनले बताए ।

‘सवैले आयुवेर्दिक औषधी पद्धति भन्ने वित्तिकै परम्परागत प्रणालीलाई बुझ्ने गरेका छौं,’ उनले भने, ‘तर प्रादेशिक अस्पतालले परम्परागत तरिकाले सेवा दिंदैन, आधुनिक प्रबिधिको प्रयोग गरी एलोपेथिक पद्धति जस्तै यसले सेवा दिनेछ ।’