धनगढीमा समायोजन हुन थाले विद्यालय

धनगढी । धनगढी उप महानगरपालिकाले गरेको निर्णय अनुसार धनगढीका सामुदायि विद्यालय समायोजन हुन थालेका छन् । धनगढी उप महानगरपालिकाले विद्यार्थी संख्या कम भएका, भौतिक संरचनाको अभाव भएका केही सामुदायिक विद्यालय तथा केही विद्यालयका कक्षाहरु समायोजन गर्ने निर्णय गरेको थियो ।

जस अनुसार धनगढीका ९ वटा विद्यालय समायोजन भई संयुक्त रुपमा पठनपाठन गर्न थालेका छन् । धनगढी उप महानगरपालिकाका अनुसार धनगढी–११ मा रहेको जोकैया आधारभुत विद्यालय सोही वडाको वेला आधारभुत विद्यालयमा समायोजन भई पठन पाठन सुरु भएको छ । सो विद्यालयको कक्षा १ देखि कक्षा तीन सम्म समायोजन गरिएको थियो ।

त्यसैगरी धनगढी–१८ को नेपाल भू.पु सैनिक आधारभुत विद्यालयका कक्षा २ र ३ सोही वडाको खप्तडी आधारभुत विद्यालयमा समायोजन भई पठनपाठन सुरु भएको उप महानगरपालिकाका शिक्षा, युवा तथा खेलकुद महाशाखा प्रमुख नरेन्द्र खातिले बताए । उनका अनुसार धनगढी–१७ मा रहेको कालिका आधारभुत विद्यालया कक्षा ४ र ५ सोही वडाको न्यू कालिका आधारभुत विद्यालयमा समायोजन भई पठनपाठन सुरु भएको छ ।

त्यसैगरी धनगढी–६ को भैरब बाबा आधारभुत विद्यालय सोही वडाको बासुदेवि माविमा समायोजन भई संयुक्त पठनपाठन सुरु भएको छ । भैरवबाबाका ६ देखि ८ सम्मका कक्षा बासुदेवि माविमा समायोजन गर्ने निर्णय भएको थियो । महाशाखा प्रमुख शाखतिका अनुसार धनगढी–९ स्थित सरस्वति आधारभुत विद्यालय नजिकै रहेको वडानम्बर–८ को धनगढी माविमा समायोजन भई पठनपाठन सुरु भएको छ । सरस्वति माविको ६ देखि ८ सम्मका कक्षा समायोजन गर्ने निर्णय भएको थियो ।

यस्तै धनगढी–१२ मा रहेको नवदुर्गा आधारभुत विद्यालय कक्षा ६ देखि ८ सम्मका कक्षा सोही वडामा रहेको दुर्गा आधारभुत विद्यालयमा समायोजना भएर पठनपाठन सुचारु भएको छ, भने धनगढी १५ को जनजागृति आधारभुत विद्यालय कक्षा ६ देखि ८ सम्म सोही वडाको राष्ट्रिय माविमा समायोजन भइ पठनपाठन सुरु गरिएको उप महानगरले जनाएको छ ।

यस्तै धनगढी १३ मा रहेको जनता राष्ट्रिय मा.विको कक्षा ९–१० सोही वडाका जनता राष्ट्रिय मा.विमा सयोजन भएका छन् भने धनगढी–१६ स्थित दिपेन्द्र चारपाते मा.विको ९ र १० कक्षा सोही वडाको बेहडाबाबा मा.विमा समायोजन भइ पठनपाठन सुरु भएको महाशाखा प्रमुख खातिले बताए ।

साउन १४ गते बसेको धनगढी उप महानगर पालिका कार्यपालिकाको बैठकले साउन १४ गते उप महानगरका १४ वटा सामुदायिक विद्यालयलाई समायोजन गर्ने निर्णय गरेको थियो । वैठकले आधारभूत तहका दुईवटा विद्यालयका १ देखि ५ सम्मका सबै कक्षा, आधारभूत तहकै ६ वटा विद्यालयका ६ देखि ८ सम्मका कक्षा र दुईवटा विद्यालयका ९ र १० कक्षा गाभ्ने निर्णय गरेको थियो ।