धान वाली लगाउने वेला मल अभाव

धनगढी

    रोपाई गर्ने सिजन शुरु हुन थाले पनि किसानले रसायनिक मल पाउन सकेका छैनन् । लामो समय देखिको लकडाउनका कारण कैलालीमा किसानलाई रसायनिक मलको अभाव भएको छ । 

  लकडाउनका कारण आवत जावत संगै बजार बन्दले सुदूरपश्चिममा समयमै मल आयात नहुँदा बर्षे वाली लगाउने मुखैमा किसानलाई रसायनिक मलको समस्या भएको छ ।  कैलारी गाउँपालिका वडा नं. ८ दुधियाका भलमन्सा राजाराम चौधरीले भने– ‘यो वर्षको मौसममा निकै परिबर्तन भएको छ, पानी परीरहेको छ तर मल र बिउको अभाव छ ।’  किसानहरुलाई धानको वीउ छर्न निकै हतार भइसकेको भए पनि रासायनिक मल उपलब्ध नहुँदा समस्या भएको उनले बताए ।

   घोडाघोडी नगरपालिका वडा नंम्बर ५ राजिपुरका बाधुराम चौधरीले भने–‘यो बर्ष बर्खा चाडै लाग्ने जस्तो छ तर बैशाखको अन्तिममा सधै धान को बीउ राख्ने गर्दथ्यौं, यो बर्ष लकडाउनका कारण न त गाउँ घर तिरका सहकारी, नत भारतीय बजारबाट  रासायनिक मल ल्याउन सकिने अवस्था छ, जसका कारण बिउ राख्न समस्या भएको छ ।’ उनले मल र बिउ नपाएपछि खेतमा बिउ राख्न समस्या भएको बताए ।

  घोडाघोडी नगरपालिका ३ का बिहारी लाल चौधरीले पायक परेका सहकारी सस्थामा बिहान ४ बजे देखि साझ ६ बजेसम्म लाइन बस्दा पनि मल नपाएर फर्किएको दुखेसो गरे ।

   गौरीगंगा नगरपालिकामा रहेको नवज्योति सहकारी सस्थाले आफना सहकारी सेयर सदस्यहरूलाई रसायनिक मल बाँडेको भएपनि सहकारी सस्थाका सेयर सदस्य नभएका किसान भने रसायनिक मल पाउनबाट बन्चित भएका छन् ।

  कृषि सामाग्री केन्द्र धनगढी र साल्ट ट्रेडिङ कर्पोरेशन लिमिटेडले कैलालीका विभिन्न सहकारीहरु मार्फत रसायनिक मल बितरण गर्ने गरेको छ । साल्ट ट्रेडिङ कर्पोरेशन लिमिटेड सुदूरपश्चिम कार्यालय धनगढीका नायब महाप्रबन्धक केशवप्रसाद पाण्डेले आफुहरुसँग स्टकमा भएको मलहरु विक्री गरेको बताए । दुबै सस्थाले रसायनिक मलको अभाव हुन नदिने दाबी गरे पनि कृषकले भने मल नपाएको गुनासो गरिरहेका छन् ।

   नेपालमा कोरोना भाइरसको संक्रमणबाट बच्नका लागि चैत ११ गते देखि जारी लकडाउनका कारण पछिल्लो समयमा कृषकलाई समस्या भएको छ । कृषि सामाग्री केन्द्र धनगढीले कैलालीमा एक हजार ८० मेट्रीक टन युरिया, एक हजार दुई सय ४९ मेट्रीक टन डिएपि र ६८ मेट्रीक टन पोटास जिल्लामा रहेका विभिन्न सहकारी मार्फत बितरण गरिएको केन्द्रका धनगढी प्रमुख नवल सिह बोगटीले जानकारी दिए । उनले भने–‘कृषकलाइ आवश्यक पर्ने रसायनिक मल कमि हुन दिदैनौ, लकडाउनमा पनि कृषकलाई मलको कमी हुन नदिन लागिरहेका छौं ।’